منزل الرئيس
في يوم، الرئيس مبارك رجع بيته في مصر الجديدة فلقى صنايعية شغالين في الدور الأرضي وقالبين الفيلا.
وبعد ثواني، نادى على مسئول الإنشاءات في رئاسة الجمهورية، وسأله: أنتم بتعملوا إيه هنا؟
الراجل رد: يا فندم.. الهانم طلبت تغييرات في لون الحيطان والستاير اللي في الدور الأرضي علشان بقالهم فترة طويلة متغيروش.
مبارك وشه بان عليه الغضب، وقاله: وطبعًا البيت هيتقلب مورستان يومين تلاتة.. ما كنتم تشتغلوا في أي وقت تاني.
مسئول الإنشاءات حاول يهدي الرئيس، وقال له: لا لا يا ريس.. الموضوع مش هياخد ساعتين تلاتة.. سيادتك هتستريح شوية، وأول ما تنزل هيكون كله تمام والعمال خلصوا.
مبارك قال له: يا سلام؟ إزاي يعني؟.. ما أنا عارف النقاشة والدهانات بتاخد وقت قد إيه.
مسئول الإنشاءات في رئاسة الجمهورية قال للرئيس: إحنا جايبين دهانات حديثة بتنشف بسرعة جدًا.. وزي ما قلت لحضرتك، ساعتين بالضبط.
مبارك رد: دهانات جديدة؟ يعني مستوردة أكيد؟!.. ودي مين اللي هيدفع فلوسها؟